रात्रिकालिन व्यवसाय खुलाउनुपर्ने माग गर्दै माइतीघरमा प्रदर्शन

काठमाडौं / दोहोरी साँझ तथा रात्रिकालिन व्यवसाय सञ्चालन तथा व्यवस्थापन समितिले तत्काल दोहोरी तथा रात्रिकालिन व्यवसाय खुलाउनुपर्ने माग गर्दै काठमाडौंमा शान्तिपूर्ण प्रदर्शन गरेको छ ।

आज काठमाडौंको माइतिघरमा सहभागीहरुले यो क्षेत्र खुलाउनका लागि सरकारले कुनै चासो नदेखाएको भन्दै प्रदर्शन गरेका हुन् ।

यसअघि पटक पटक आफूहरुको व्यवसाय सञ्चालनका लागि सरकार तथा सम्बन्धित सबैलाई आग्रह गर्दापनि कुनै सुनुवाई नभएको भन्दै सडकमा आउनुपरेको उनीहरुले बताएका छन् ।

कोभिड–१९ ले नेपालको अर्थतन्त्र अस्तव्यस्त भएको र यसमा सबैभन्दा ठूलो मारमा दोहोरी साँझ तथा रात्रिकालिन व्यवसाय पनि परेको समितिको गुनासो छ ।

उनीहरुले सवै क्षेत्र खुल्ला भइसकेको र अब दोहोरी साँझ तथा रात्रिकालिन व्यवसाय सञ्चालन गर्न दिनुपर्ने माग गरेका छन् ।

दोहारी तथा रात्रिकालिन व्यवसाय तत्काल खुलाउनुपर्ने भन्दै समयमै आफुहरुका मागको सुनुवाई नभए अर्को चरणको आन्दोलन गर्ने चेतावनी पनि समितिले दिएको छ ।

Loading...
प्रकाशित मिति १८ मंसिर २०७७, बिहीबार १७:४८