ह्वात्तै घट्यो सुनको भाउ

काठमाडौं : दुई महीनादेखि लगातार उकालो लाग्दै गएको सुनको मूल्य पछिल्लो साता भने ओरालो लागेको छ । गत साताको शुक्रबारसम्म वृद्धि भइरहेको सुनको मूल्य आइतबारदेखि ओरालो लागिरहेको छ । शनिबार प्रतितोला ७२ हजार रुपैयाँमा कारोवार भएको छापावाला सुन आइतबार प्रतितोला ५०० रुपैयाँले घटेर ७१ हजार ५०० रुपैयाँ पुगेको थियो । त्यस्तै मङ्गलबार सुनको मूल्य घटेर ७१ हजार रुपैयाँ पुगेको थियो । बुधबार भने सुनको मूल्य स्थिर रह्यो ।

आज पुनःसुनको मूल्यमा प्रतितोला २०० रुपैयाँले गिरावट आएको छ । बिहीबार छापावाला सुनको मूल्य प्रतितोला ७० हजार ८०० रुपैयाँ कायम भएको नेपाल सुनचाँदी व्यवसायी महासङ्घले जनाएको छ ।

त्यसैगरी तेजाबी सुनको मूल्य पनि प्रतितोला २०० रुपैयाँले घटेको छ । तेजाबी सुनको मूल्य ५० हजार ५०० रुपैयाँ निर्धारण गरिएको महासङ्घले जनाएको छ । सुनको मूल्य घटेसँगै चाँदीको मूल्यमा पनि सामान्य गिरावट आएको छ । बुधबार प्रतितोला ८८० रुपैयाँमा कारोवार भएको चाँदीको मूल्य पाँच रुपैयाँले घटेर ८७५ रुपैयाँ पुगेको महासङ्घले जनाएको छ ।

अन्तर्राष्ट्रिय बजारमा पनि सुनको मूल्य ओरालो लागेको छ । विश्व बजारमा आज सुनको मूल्य प्रतिऔस एक हजार ५०२.४० अमेरिकी डलर रहेको छ । केहीअघि अन्तर्राष्ट्रिय बजारमा सुनको मूल्य प्रतिऔस एक हजार ५४० डलरसम्म पुगेको थियो । विश्व बजारमा सुनको मूल्यमा देखिएको गिरावटसँगै नेपाली बजारमा पनि मूल्य घटेको महासङ्घले जनाएको छ ।

Loading...
प्रकाशित मिति २६ भाद्र २०७६, बिहीबार ०९:०४