माल्दिभ्स विरुद्ध नेपालको शानदार जीत

काठमाडौँ / नेपालले माल्दिभ्सलाई ८४ रनको फराकिलो अन्तरले पराजित गरेको छ । १३ औँ दक्षिण एसियाली खेलकुद (साग) अन्तर्गत पुरुष क्रिकेटमा नेपालले माल्दिभ्सलाई हराएको हो ।

त्रिवि क्रिकेट मैदान कीर्तिपुरमा भएको खेलमा टस जितेर पहिला ब्याटिङ गरेको नेपालले निर्धारित २० ओभरको खेलमा ७ विकेटको क्षतिमा १६३ रन बनाएको थियो । १६४ रनको लक्ष्यसहित जवाफी ब्याटिङमा उत्रिएको माल्दिभ्स निर्धारित २० ओभरमा ६ विकेटको क्षतिमा ७९ रनमा समेटियो ।

माल्दिभ्सका लागि मोहमद रिसवान र मोहम्मद आजमले समान १३ रन बनाए भने अली इभानले ११ रन बनाए । यसबाहेक अन्य ब्याट्सम्यान दोहोरो अंकको रन बनाउन असफल रहे ।

बलिङतर्फ नेपालका सुशान भारी र ललित राजवंशीले समान दुई विकेट हात पारे ।

यसअघि नेपालका लागि करन केसीले विस्फोटक ब्याटिङ गर्दै सर्वाधिक ४० रन बनाए । उनले १६ बलमा चार छक्का र दुई चौकाको मद्दतमा उक्त रन बनाएका हुन् ।

यस्तै, दीपेन्द्र सिंह ऐरीले ३९ रनको योगदान गरे भने विनोद भण्डारी र कप्तान ज्ञानेन्द्र मल्लले समान १९ रन बनाए ।माल्दिभ्सका लागि लीम शाफिगले ४ ओभरमा ३३ रन खर्चिदैँ तीन विकेट लिए । यस्तै अमिल मौरुफले दुई विकेट हात पारे ।

Loading...
प्रकाशित मिति २० मंसिर २०७६, शुक्रबार १०:३८